Бишкек шаардык билим жана илим кызматкерлеринин кесиптик бирлик комитетинин төрагасы Кубатбек Садырбекович Абдракманов жана «Жыргалан» санаторийинин директорунун орун басары Акылбек Дуйшобаев уюмдар ортосунда кызматташтык келишимине кол коюшту.
Келишим Бишкек шаардык комитети тарабынан мектептердин жана мектепке чейинки билим берүү мекемелеринин кызматкерлери үчүн санаторий-курорттук жолдомолорду сатып алууну карайт. Келишим бир жылдык мөөнөткө түзүлдү.
Белгилей кетсек, Кыргыз Республикасында 2027-жылдын 31-декабрына чейин Кесиптик бирликтер федерациясынын санаторий-курорттук мекемелерине жеңилдетилген жолдомолорду берүү боюнча мораторий күчүндө. Бул чектөө 2023-жылдын 22-ноябрындагы Президенттин Жарлыгы менен аталган объекттерди оңдоо жана жаңылоо, ошондой эле ден соолукту чыңдоо кызматтарына толук санариптештирилген жеткиликтүүлүк системасын киргизүү максатында киргизилген.
Ушуга байланыштуу Бишкек шаардык билим жана илим кызматкерлеринин кесиптик бирлик комитети кесиптик бирлик мүчөлөрүнүн эс алуусун жана ден соолугун чыңдоону өз алдынча камсыздап, жолдомолорду кесиптик бирликтин бюджеттин эсебинен сатып алууда. Бул бюджет кесиптик бирлик мүчөлөрүнүн эмгек акысынан (айлык акысынын 1%) кармалган каражаттардан жана Борборлоштурулган социалдык колдоо фондунун каражаттарынан түзүлөт.
«Жыргалан» санаторийи менен түзүлгөн келишим борбор калаанын билим берүү кызматкерлерин колдоодогу маанилүү кадам болуп, аларга окуу жылындагы жүктөмдөн кийин ден соолугун чыңдоого жана күч-кубатын калыбына келтирүүгө мүмкүнчүлүк берет.
Бишкек шаардык билим жана илим кызматкерлеринин кесиптик бирлик комитети мугалимдерди жана билим берүү тармагындагы кызматкерлерди социалдык жактан колдоо жана кепилдиктерди кеңейтүү боюнча иштерин улантууда.
