Кыргыз Республикасынын Билим берүү жана илим кызматкерлеринин кесиптик бирлигинин 100 жылдык мааракесине арналган Эл аралык форумдун алкагында маанилүү окуя болуп өттү – Өзбекстан жана Тажикстан республикаларынын кесиптик бирлик уюмдары менен өз ара кызматташуу тууралуу меморандумдарга кол коюлду.
Бул документтер тараптардын кызматкерлердин укуктарын жана кызыкчылыктарын коргоо жаатында тажрыйба алмашуу, өнөктөштүктү өнүктүрүү жана тереңдетүү, ошондой эле мугалимдер менен илимий кызматкерлердин социалдык жана кесиптик макамын жогорулатууга багытталган долбоорлорду биргелешип илгерилетүү ниеттерин бекемдеди.
Кол коюлган келишимдер жалпы демилгелерди ишке ашырууга, окуу-семинарларды, конференцияларды жана маданий-агартуу иш-чараларын өткөрүүгө жаңы мүмкүнчүлүктөрдү ачат. Өзгөчө көңүл жаш адистерди даярдоого, студенттик чөйрөдө кесиптик бирлик кыймылын өнүктүрүүгө жана билим берүү кызматкерлерине татыктуу эмгек шарттарын түзүүгө бурулат.
Ошентип, меморандумдарга кол коюу эл аралык өнөктөштүктү чыңдоого багытталган маанилүү кадам болуп, Профсоюздун 100 жылдыгы – бул чоң тарыхтын жыйынтыгын чыгаруу гана эмес, мындан аркы өнүгүү жана кызматташуу үчүн жаңы горизонторду ачып жаткандыгын дагы бир жолу тастыктады.
